कवि दुर्गालालया मिखाय् थिमिया बिस्काः जात्रा

झिदँ न्ह्यः वैशाख १ गतेया दिनय् कवि दुर्गालल ख्वप व जःखः चाःहिले धुंकाः सनिलय् थिमि चाःह्यू झाःगु जुयाच्वन । उगु दिनय् थिमिइ बाँय्‌लिंया जात्रा (सनिलया जात्रा) जुयाच्वन । सु बुरा, सु ल्याय्‌म्ह, सु मचा सु तःमि सु चीमि दक्वं उतिकं हे जात्राय् न्ह्याइपुका च्वंगु खनाः भावविभोर जुयाः कवि दुर्गालालजुं थुगु चिनाखँ च्वयादिल ।

थुगु चिनाखँ थाैं सनिलया जात्राया अवसर लाकाः थन न्ह्यब्वया च्वना ।

बिस्काःखुनु सनिलया थिमि

उखें मवंसें जि थुखें वैगु
गुम्ह देवं जुइ घ्वाःगु जितः
छत्थुं हे का गुगुं इलय् या
म्हगसं तय्ज्जू याःगु जितः !

धन छुं मखु न त मान प्रतिष्ठा
काय् म्ह्याय् थःथिति हे खः छुं
सःस्यू धायेगु थ्व छुछु थें च्वंसां
निग्ति भचा हे न त खः छुं !

थ्व धिमे थ्व भुस्याः गुगु थ्वैच्वन खः
झ्वाल्ल ति वैच्वन अमृत-बाः
सीपिं तक नं जुरुजारु दनाः
अहह ! स्वरे कैच्वन तुतिपाः !

म्हय् दु सिन्हः इमि लकसय् दु सिन्हः
न्ह्यात्थाय् स्वःसां न्यंक सिन्हः
सिन्हः सिन्हःया हूलय् लानाः
जूगु अथेंका ल्याय्म्ह जि नं !

न्हिच्छि चाःहिलाः सन्ध्याःकाः ई
गबले कि लिहां वन्य जि त्यना
थन हे तिनि ह्वन्यदैगु छु स्यू जिं
जीवनलिस्य थय् लिक्क च्वनाः !

तःमिं मखना चीमिं मखना
वर्ष ज्यलं न बुरा हे खं
सकलें सकलें जोवन ज्वाँय्ज्वाँय्
सःपिं मात्र मनूथें च्वं

धन्य छिपिं यः आजु नमस्ते
छिमिसं स्वंगु व गुगु धन खः
खंक्य फुसा जिं सत्य वहे जुइ
धरतीया हे अमृत घः !

११२५ चौलाथ्व ६