थिमिइ नं नेपालभाषाया कक्षा

मध्यपुर थिमिया आदर्श उच्च मा.वि.इ थुगुसी निसें ऐछिक विषय कथं नेपालभाषा कक्षा न्ह्याकूगु दु। थुकिया लागिं पहल यानादीम्ह विद्यालयया प्रधानाध्यापक विद्या चित्रकारं स्कूलय् नेपालभाषा ब्वंपिं विद्यार्थीतय्गु ल्याः नं यक्व दुगु खँ कनादीगु दु । नेपालभाषाया विकल्पय् गणित, जनसंख्या थेंज्याःगु विषयत दुसां थम्हं धाःसा विद्यार्थीतय्त नेपालभाषा हे ब्वनेत सल्लाह बियागु खँ वय्कलं कनादिल ।

शिक्षक के.के. मानन्धरं नेपालभाषा ब्वंका च्वनादीगु उगु स्कूलय् शिक्षकयात विद्यालयया हे श्रोतं पारिश्रमिक बीगु व्यवस्था यानातःगु दु अले ब्वंकेत माःगु सफू धाःसा नेपाल सरकारं हे पिकयातःगु दु । स्कूलं इच्छा याःत धाःसा नेपालभाषाया कक्षा संचालन याये थाकु मजू धकाः पुष्टि याःगु थुगु स्कूलं मेमेगु स्कूलय् नं कुतः यात धाःसा नेपालभाषा ब्वंकीगु स्कूलया ल्याः म्हो मजुइगु भलसा नं प्वंकूगु दु। यदि स्कूल स्तरय् हे भाषा ब्वंकेगु व्यवस्था याये फत धाःसा थ्व भाषा लिपा तकं म्वानाच्वीगु बिचाः नेवाः वस्ती नेवाः स्कूल अभियानया कजि दिपक तुलाधरं प्वंकादी। थुकिया दसुकथं वय्कलं दकलय् न्हापां औपचारिक रुपं नेपालभाषां ब्वंकेत चायेकूगु जगत सुन्दर ब्वनेकुथियात कयादी गन विद्यार्थीतय्सं बांलाःगु डिभिजनय् एसएलसी पास यानाच्वंगु दु ।

भाजु दिपक तुलाधरया संयोजकत्वय् थेच्व, बलम्बु, किपू लगायत थीथी नेवाः वस्ती नेवाः स्कूल चायेकेगु अभियान न्ह्यानाच्वंगु दुसा थुकिं फुक्क नेवाः स्कूलया विद्यार्थी व अभिभावकपिं सन्तुष्ट जुयाच्वंगु खँ सम्बद्ध स्कूलतय्सं धाःगु दु। अथे हे प्यदँ न्ह्यवंनिसें नेवाः स्यनामि दबू व कामपाया पहलय् नीनिगू सरकारी स्कूलय् नेपालभाषा ब्वंकेगु ज्या नं न्ह्यानाच्वंगु दु ।

लुमंकेबहः जू, भारतया सिक्किम प्रान्तय् आः तकया दुने च्यागू स्कूल लगायत नेपाःया ४९ गू स्कूलनापं मुक्कं ५७ गू स्कूलय् नेपालभाषा ब्वंकेगु ज्या जुयाच्वंगु दु ।

जेम्सय् पहल
थीथी स्कूलय् नेपालभाषा ब्वंके बीगु झ्वलय् यलया नांजाःगु जेम्स स्कूलय् नं नेपालभाषा तयेकगु पहल नेवाः वस्ती नेवाः स्कूल परियोजनां यानाच्वंगु खँ सीदुगु दु। लिसें येँया ज्याथास्थित अन्नपूर्ण उच्च माविइ नं नेपालभाषा ब्वंकेत इनाप यासें उगु परियोजनाया दुजःपिं डेलिगेशन वंगु दु । (सन्ध्या टाइम्स)